Стартуваше тринаесеттиот по ред фестивал на народна култура „Пображење“ во Вевчани. Синоќа со дефиле по вевчанските улици, Вевчани пулсираше во духот на народната култура и традиција.
На просторот пред Мултикултурниот центар, посетителите имаа можност преку ревијата на народни носии и песни и ора од Леринско Поле, насловена „Моштенки“ на Филип Јаковлески, да се запознаат со етнолошкото богатство на овој крај.
И годинава на фестивалот учествуваат ансамбли од земјата и странство, истакна Тошо Чочороски, директор на фестивалот.
„И оваа година се потрудивме да обезбедиме содржинска програма на нашиот фестивал, каква што доликува на Вевчани и на нашата држава. Се трудевме фестивалот да си ја задржи својата автентичност, разноликост и посебност, при што во иднина уште повеќе ќе работиме во таа насока. Не радува што интересот за фестивалот од година во година е се поголем, истакна Чочороски.
Ден претходно, на различни локации низ општината децата од ликовното студио „Св.Кирил и Методиј“ од Битола, сликаа, додека бројните посетители вечерта можеа да уживаат во нивните уметнички творби, на изложбата насловена „Народната култура во Вевчани, инспирација за младите ликовни уметници“.
Вечерва на програмата е дефиле на учесниците и нивните настапи, а фестивалските денови завршуваат утре на празникот „Преображение“ со концертот на „Ансамблот Македонија“.
Фестивалот „Пображење“, покрај зазачувување, на македонското етнолошко и културно богатство има за цел да ги поттикне културно уметничките друштва, да го истражуваат македонскиот фолклор, а за ансамблот кој најдобро ќе го презентира културното богатство, е резервирана плакетата „Чувари на изворната традиција“.
