Генералниот секретар на Обединетите нации, Антонио Гутереш, предупреди дека „дојде ера на глобално вриење“, бидејќи јули ќе биде најтоплиот месец досега забележан на Земјата.
„Климатските промени се на дело. Тоа е страшно. И тоа е само почеток. Заврши ерата на глобалното затоплување. Дојде ерата на глобално вриење“, изјави Гутереш пред новинарите во седиштето на ОН во Њујорк.
Тој рече дека веќе нема двоумење, изговори и чекање други да тргнат први, бидејќи нема време за тоа. Според податоците на Светската метеоролошка организација и Службата за климатски промени Коперник при Европската комисија, јули е на пат да биде најтоплиот месец досега. Податоците покажуваат дека највисоката температура на океаните за овој период од годината е забележана во јули.
Гутереш рече дека е можно да се ограничи зголемувањето на глобалната температура на 1,5 Целзиусови степени и да се избегнат најлошите климатски промени.
„Ни требаат амбициозни нови национални цели за намалување на емисиите од членките на Г20“, рече Гутереш.
Тој ги повика компаниите, градовите, регионите и финансиските институции да дојдат на самитот за клима со веродостојни планови за транзиција.
„Доказите се насекаде: човештвото го иницираше уништувањето. Ова не смее да предизвика очај, туку акција. Сè уште можеме да го запреме најлошото“, додаде тој.
