Притискањето на копчето од клучот со кое се отвора автомобилот или ставање на клучот во бравата пред да се стартува автомобилот наскоро ќе бидат минато.
Ова го тврдат инженерите на шведскиот автомобилски гигант Волво кој на официјалната страница го претставија возилото кое прима наредби со помош на апликација на паметниот телефон.
Волво веќе најави дека од 2017 година ќе нуди автомобили без клуч – во возилото ќе се влегува со помош на паметниот телефон, а воедно ќе служат и за стартување на моторот од возилото. Најавените новитети ќе следат, најверојатно, и кај другите производители на автомобили кои исто така најавија слични услуги.
Волво, паметниот телефон всушност го нарекува дигитален клуч, а станува збор за апликација со чија помош сопствениците ќе комуницираат со своето возило, а врската се отстварува преку Bluetooth.
Дигиталниот клуч сопствениците на возилата ќе можат да го споделат по пат на телефонот и со други членови од семејството.
