Кина со трет носач на авиони од свое производство

Кина официјално го пушти во пловидба својот трет носач на авиони на церемонија организирана на бродоградилиштето во Шангај, јавува кинеската новинска агенција.

Ова е втор носач на авиони кој е целосно изграден во Кина и е технолошки подобрен во однос на претходниот. Тој ќе ѝ биде предаден во употреба на воената морнарица по воената проба на море.

Засега не се објавени информации кога е предвидено овој носач на авиони да почне да се користи, но најверојатно тоа ќе се случи наредната година.

Бродот е именуван „Фуџијан“ по име на една кинеска провинција, како и другите два брода кои се именувани „Лианинг“ и „Шандонг“.

Неговото официјално презентирање во јавноста доаѓа во време кога се покренува тензијата во кинеско-американските односи поради островот Тајван населен со 24 милиони жители и автономна управа, иако Кина смета дека тој е дел од кинеската историска територија.

Поради приближувањето на односите САД – Тајван во последните години, кинеската воена морнарица во неколку наврати своите носачи на авиони ги испрати во близина на островот. Овој носач на авиони е многу поголем од претходните два.

Според агенцијата Џејнс, специјализирана за воени податоци, САД имаат убедливо најмногу носачи на авиони – 11, Кина и Велика Британија имаат по два, а Русија, Франција, Италија, Индија и Тајланд по еден носач на авиони.

Првиот кинески носач на авиони „Лиаонинг“ беше пуштен во употреба во 2012, а главно се користи како платформа за обука. Собраните знаења потоа послужија за изградба на „Шандонг“, првиот носач на авиони изграден во Кина кој почна да се користи во 2019.