Американскиот милијардер и извршен директор на „Тесла“, Илон Маск, објави на социјалната мрежа X дека ја напушта својата функција во администрацијата на Доналд Трамп. Во неговата објава тој му се заблагодари на Трамп за можноста да го води Одделот за владина ефикасност (DOGE).
Белата куќа соопшти дека Маск од синоќа веќе не е специјален владин службеник. Неговата улога беше привремена и излегувањето од владата не е неочекувано, но уследи еден ден откако Маск го критикуваше новиот закон за буџет, кој го оцени како „прескап“ и спротивен на неговата визија за рационална и ефикасна влада.
Според Њујорк тајмс, неговата „разочараност од политиката“ дополнително се зголемила по неуспехот на кандидатот за судија во Висконсин, за чија кампања Маск вложил 25 милиони долари.
Во времето на политичкото вклучување на Маск, Тесла забележа пад од 13% во продажбата во првиот квартал, најголем во својата историја. Акциите паднаа за дури 45% и иако делумно се опоравија, тие сè уште се околу 10% под нивната почетна вредност.
