Четириесет и еден мигрант загинале, а четворица ја преживеале несреќата кај италијанскиот остров Лампедуза, кога бродот со кој патувале од Африка бил целосно уништен, велат преживеаните. Преживеаните – тројца мажи и една жена – им кажале на спасувачите дека биле на брод што го напуштил Сфакс, Тунис, во четвртокот, но потонал за неколку часа. Во него имало 45 лица, меѓу кои и три деца. По потекло се од Брегот на Слоновата Коска и Гвинеја, а на италијанскиот остров пристигнаа денеска. Меѓу жртвите има и жена од Брегот на Слоновата Коска и нејзиното едногодишно бебе. Се вели дека тие биле спасени од товарен брод, а потоа пренесени од брод на италијанската крајбрежна стража.
Повеќе од 1.800 луѓе досега ги загубија животите оваа година преминувајќи од Северна Африка во Европа. Туниските власти соопштија дека Сфакс, пристанишен град на околу 130 километри од Лампедуза, е местото од кое мигрантите најчесто се упатуваат кон Европа, барајќи безбедност и подобар живот. Во последните денови, италијанските патроли и добротворни групи спасија уште 2.000 луѓе кои пристигнаа на Лампедуза.
