По канцерогениот чипс, Европската комисија предупреди за српски праски со опасен пестицид. Информацијата дека праските од Србија наменети за извоз во Хрватска содржат високо ниво на пестицидот хлорпирифос е објавена на веб-страницата на Европската комисија (ЕК) за брзо предупредување за храна и добиточна храна.
Ова е десетти контингент стоки од Србија што се враќа од граница од почетокот на годинава, пишува порталот Нова. Од почетокот на годинава граничната контрола утврдила дека 10 српски производи се потенцијално опасни, а минатата година (2022) во 11 од нив е утврдено постоење на штетни материи. Така, првиот случај во текот на претходната година се случил на 25 февруари, кога на унгарската граница било утврдено дека во сувиот копар има остатоци од хлорпирифос, исто како и кај неодамна вратените праски. По контакт со оваа состојка, потрошувачите може да доживеат различни ефекти врз нервниот систем, како што се главоболка, заматен вид, зголемена саливација, напади, а во екстремни случаи, во зависност од количината и должината на изложеноста – и кома и смрт, според Американски центар за контрола и превенција на болести. Овој зачин е повлечен од унгарскиот пазар. На 23 јуни 2022 година во Романија било утврдено дека праските од Србија содржат хлорпирифос. Праските се повлечени од романскиот пазар. Повторно на 9 август на границата со Словенија бил пронајден сега веќе познатиот пестицид хлорпирифос, повторно во праски. Истиот пестицид бил пронајден во српско производство на корнишони на 18 август на границата со Хрватска и било наредено производите да се вратат или да се уништат. Повторно, хлорпирифос е пронајден во производ од Србија, во комбинација со аметоктрадин, во замрзнати шумски јагоди извезени во Белгија.
Министерката за земјоделство Јелена Танасковиќ дозволи интервентен увоз и употреба на забранетата активна супстанца хлорпирифос, која долго време не се користеше во Србија, поради што деновиве беа вратени праските од Хрватска наменети за извоз, изјави директорката за развој во компанијата за продажба и производство на препарати Биогенезис, Виолета Јосифова, пренесе порталот Данас.
Според Јосифова, увезениот пестицид завршил во овоштарство, а не бил наменет за тоа, што сега може да доведе до тоа да се забрани целиот извоз на овошје и зеленчук од Србија.
извор: Nova.rs фото:shutterstock
