Турскиот претседател Реџеп Таип Ердоган ќе се сретне со рускиот претседател Владимир Путин на маргините на Самитот во Казахстан на 12 октомври.
Новинската агенција Франс прес (АФП) и германската државна агенција ДПА на 11 октомври ги цитираа турските власти според кои двајцата претседатели ќе се сретнат во Астана за време на Конференцијата за интеракција и мерки за градење доверба во Азија (CICA).
Потврдата за средба доаѓа еден ден откако портпаролот на Кремљ Димитриј Песков рече дека двајцата лидери „можеби ќе се сретнат“ во главниот град на Казахстан.
Ердоган и Путин последен пат се сретнаа во средината на септември во Узбекистан на маргините на самитот на лидерите на Шангајската организација за соработка.
Турција, која е членка на НАТО, се позиционираше како посредник меѓу Киев и Москва, по руската инвазија на 24 февруари.
Ердоган јавно изрази надеж дека може да ги собере Путин и украинскиот претседател Володимир Зеленски на разговори за ставање крај на војната. По големите неуспеси на бојното поле минатиот месец, додека украинските сили започнаа успешни контраофанзиви за ослободување на териториите окупирани од руските војници, Путин за време на говорот во кој објави дека четири украински региони сега се дел од Русија, рече дека Москва е „подготвена“ за разговори со Украина.
Зеленски ги отфрли разговорите, велејќи дека Украина ќе разговара со „следниот“ руски претседател, што имплицира дека разговорите би можеле да продолжат само откако Путин ќе биде сменет.
