Денес училиштата во Санторини се затворени, а екипите за итни случаи се распоредени на вулканскиот грчки остров, откако сеизмичка активност предизвика загриженост за потенцијално моќен земјотрес. На жителите на островот им се советува да избегнуваат големи настани на отворено и да се држат настрана од четири мали пристаништа, вклучувајќи го и пристаништето Фира, кое главно опслужува бродови за крстарење.
Од минатата среда повеќе од 200 земјотреси се почуствувани меѓу Санторини и Аморгос, најголемиот со јачина од 4,7 степени според Рихтеровата скала. Грчките власти соопштија дека островот е безбеден и дека сите мерки се превентивни.
Иако грчките експерти велат дека земјотресите, со магнитуда до 4,8 степени, не се поврзани со вулканот во Санторини, тие признаваат дека моделот на сеизмичка активност е причина за загриженост.
Санторини, популарна туристичка дестинација што ја посетуваат околу три милиони луѓе годишно, е вулкански архипелаг во јужниот дел на Егејското Море и дел од грчкиот архипелаг Киклади. Самиот Санторини е всушност калдера, огромна вулканска депресија формирана по катастрофалната минојска ерупција пред приближно 3600 години, за која се верува дека придонела за падот на минојската цивилизација на Крит.
