Шпанија следниот месец ќе испрати осум воени авиони во Бугарија за да помогне во нејзините надзорни задачи во време на руската инвазија на Украина, изјави денеска бугарскиот министер за одбрана Димитар Стојанов.
Тој прецизира дека шпанските авиони „Еурофајтер“ се очекува да слетаат во Бугарија на 1-ви ноември и ќе извршуваат должности за заштита на воздушниот простор заедно со бугарските воздухопловни сили до 23-ти декември.
Ова е уште една мисија за засилена воздушна полиција. Тоа ќе биде заедничка должност за безбедност на воздушниот простор – изјави Стојанов.
Шпанија и Холандија учествуваа во слични воздушни полициски мисии во Бугарија претходно оваа година.
Бугарија, членка на НАТО од 2004 година е домаќин на борбена група на Алијансата од околу 1.000 војници под италијанска команда, бидејќи НАТО се обидува да го зајакне своето источно крило.
