Турските власти го уапсија главниот политички ривал на претседателот Реџеп Таип Ердоган, градоначалникот на Истанбул Екрем Имамоглу, за наводна корупција и поврзаност со тероризам. Покрај него, издаден е налог за апсење на уште 100 лица.
Властите затворија неколку патишта околу Истанбул и забранија демонстрации во градот четири дена, во обид да спречат евентуални протести. Во исто време, интернет набљудувачот „Нетблокс“ објави дека Турција го ограничила пристапот до повеќе дигитални платформи, како Икс, Јутјуб, Инстаграм и ТикТок.
Имамоглу кој е во предност пред Ердоган во некои анкети, се соочува со две одделни истраги кои вклучуваат и обвиненија за водење на криминална организација, поткуп и местење тендери.
Одлуката за негово приведување доаѓа откако Универзитетот во Истанбул објави дека ја поништува неговата диплома поради наводни неправилности, а според турските закони, без валидна факултетска диплома, Имамоглу не може да се кандидира за претседател.
Овој потег, се случува само неколку дена пред главната опозициска партија (ЦХП) да го избере за свој кандидат на следните претседателски избори кои треба да се одржат во 2028 година.
Фото: sozcu.com.tr
