Националното собрание на Венецуела вчера ја одобри приватизацијата на нафтениот сектор, со што се напушта моделот на строга државна контрола воспоставен пред повеќе од две децении. Законот, потпишан од в.д. претседателката Делси Родригез, треба да овозможи странски инвестиции и приватните компании да добијат контрола врз производството и продажбата на нафта, како и независна арбитража на споровите.
Реформата следува по соборувањето и заробувањето на поранешниот претседател Николас Мадуро во американска воена интервенција, по што американскиот претседател Доналд Трамп повика на инвестиции во венецуелскиот енергетски сектор. Владата очекува промените да ги охрабрат големите американски нафтени компании да се вратат во земјата.
Инаку, законот последен пат беше изменет пред две децении, кога претходникот на Мадуро, Уго Чавез, воведе строга државна контрола врз нафтената индустрија, столб на неговата револуција инспирирана од социјалистите.
