Еден од најмаркантните пијанисти на денешницата, турскиот виртуоз на пиано Фазил Сеј, вечер на програмата на фестивалот „Охридско лето“.
Со својот извонреден пијанистички талент, Фазил Сеј ги воодушевува слушателите низ светот повеќе од 25 години. Неговиот репертоар е разновиден – почнувајќи од делата на Бах, преку Виенските класичари и делата од романтизмот, сè до современата музика, вклучувајќи ги и композициите кои ги пишува тој.
Љубителите на звуците на пијаното, вечерва имаат несекојдневна можност да уживаат во изведбите на еден од најмаркантнитепијанисти на денешницатаФазил Сеј. Станува збор за виртуоз кој е карактеристичен по неговиот несекојдневен близок однос кој го оставрува со публиката, манифестиран најмногу преку разновидноста на програмата со која се претставува на неговите концерти.Критичарите велат дека неговите концерти претставуваат вистинско уживање, и си многу подиректен контакт со публиката, објаснува Гордана Јосифова Неделковска музичкиот селектор на фестивалот.
„За прв пат во Македонија е овој голем уметник, маестрален пијанист, вечерва ќе се претстави со дела од Хајдн, Моцарт, Гершвин и на крај ќе изведе неколку негови композиции зошто во истовреме Маестро Фазил Сеј е и познат композитор“ вели селекторката на фестивалот.
Фазил Сеј, досега снимил повеќе компакт дискови со дела од Бах, Моцарт, Бетовен, Гершвин и Стравински, кои се високо оценети од критиката и за кои има добиено неколку награди, меѓу кои и престижната награда „Еко Класик“(Echo Klassik- три пати). Сеј, не го криеше своето воодушевување од можноста да настапи токму на нашата најреномирана музичко-сценска манифестација.
„Ова е фантастичен фестивал, многу познат фестивал, и едни од најдобрите светски уметници доажаат овде, ова е мој прв концерт во Македонија во мојот живот.Многу сум среќен што сум на ова прекрасно место“ изјави Сеј.
Покрај солистичката дејност, Сеј редовно настапува и како камерен музичар заедно со еминентни изведувачи, како што се виолинистот Максим Венгеров, виолончелистот Николас Алстедт и други.
