Најмалку 247 загинати и преку 350 повредени. По катастрофалниот земјотрес во централна Италија бројот на жртвите и натаму расте. Спасувачките екипи без престан трагаат по преживеани во урнатините.
Секогаш одново италијанските власти мораа да го коригираат нагоре бројот на жртвите кои загинаа или се повредени во тешкиот земјотрес.
Во меѓувреме италијанската служба за цивилна заштита говори за најмалку 247 загинати. Претходно беше соопштена бројка од 159 загинати. Италијанскиот премиер Матео Ренци претходно при посетата на погодените подрачја изјави „Овој биланс не е конечен“
И натаму како исчезнати се водат 100 луѓе. Шансите тие да бидат пронајдени живи се намалуваат од час во час. И во текот на целата ноќ пожарникари и доброволци со голи раце ги расчистуваа разурнатите куќи во потрагата по затрупани луѓе.
За стотици луѓе кои останаа без покрив над главата поставени се шатори, соопшти италијанската служба за цивилна заштита. Стотици други се сместени во спортски сали. Како што јави италијанската новинска агенција Анса, земјотресот само во регионот Марке без поктив над главата остави 1500 луѓе. Премиерот Ренци вети: „Никој нема да биде оставен сам на себе: ниту една фамилија, ниту една заедница, ниту едно соседство“.
