Американски медиуми јавија дека најмалку 20 луѓе биле убиени, а 30 повредени во напад на црква во сојузната држава Тексас. Нападот се случил во Првата баптистичка црква во Сатерленд Спрингс, мала заедница која се наоѓа на 50 километри оддалеченост од градот Сан Антонио.
Напаѓачот кој отворил оган кон насобраната толпа во црквата, како што јавија медиуми, бил застрелан од полицијата. Алберт Гомез Јуниор од локалната полиција изјави дека најмалку 27 лица загинале, а 25 биле повредени.
„Нека господ биде со луѓето од Сатерленд Спрингс, Тексас. ФБИ и спроведувачите на законот се на местото на настанот. Ја набљудувам ситуацијата од Јапонија“, напиша на Твитер американскиот претседател Доналд Трамп, кој се наоѓа на 12 дневна турнеја низ Азија.
Напаѓачот кој уби најмалку 27 луѓе во Баптистичка црква во градот Садерленд Спрингс, Тексас, е белец на возраст од околу 20 години, јави телевизиската мрежа Еј-Би-Си.
Телевизијата повикувајќи се на полициски извори наведува дека е извршена прелиминарна идентификација на напаѓачот и е откриено дека тој неодамна се „пофалил“ на Фејсбук со пушка која наликува на АР-15.
Според очевидци на инцидентот, напаѓачот истрелал повеќе од 30 куршуми од полуавтоматско оружје.
Напаѓачот мирно влегол во црквата за време на неделната служба и почнал да пука, при што уби 27 лица, а десетина се повредени. Во инцидентот убиен е и напаѓачот.
