Безбедна количина на кафе за здраво срце

Умереното консумирање кафе може да има позитивно влијание врз здравјето на срцето, покажува новото научно соопштение на Американското здружение за срце (American Heart Association – AHA), објавено во списанието Circulation.

Според анализата, внес до 400 милиграми кофеин дневно, што одговара на три до пет шолји кафе (по околу 225 мл), е безбеден за повеќето возрасни лица и не го зголемува ризикот од кардиоваскуларни заболувања.

Истражувачите утврдиле дека кафето без додаден шеќер, сирупи, шлаг и засладувачи е поврзано со:

помал ризик од коронарна срцева болест;
помал ризик од мозочен удар;
помал ризик од срцева слабост;
намален ризик од дијабетес тип 2.
Најголемите придобивки се забележани кај лицата кои пијат две до четири шолји кафе дневно, додека консумирањето повеќе од четири до пет шолји може да го зголеми ризикот од срцева слабост.

Експертите советуваат кафето да се консумира без многу шеќер и калорични додатоци, да не се пие доцна навечер ако го нарушува сонот и да не се користи како замена за доволен одмор.

Авторите нагласуваат дека изворот на кофеинот е важен. За разлика од кафето и чајот, енергетските пијалаци често содржат значително поголеми количини кофеин, шеќер и други состојки кои можат да го зголемат крвниот притисок и ризикот од нарушувања на срцевиот ритам.

„За повеќето возрасни, внес до 400 милиграми кофеин дневно е безбеден и не го зголемува кардиоваскуларниот ризик“, изјави д-р Грегори Маркус, кардиолог од Универзитетот во Калифорнија – Сан Франциско и главен автор на извештајот.

Извори: American Heart Association (AHA), списание Circulation