Капините го зајакнуваат имунитетот, го намалуваат холестеролот и го штитат срцето

Овие вкусни црни бобинки, по кои многумина од нас посегнуваа во детството додека престојуваа кај баба и дедо на село, не само што освежуваат, туку имаат и бројни придобивки за здравјето. Капините се познати по тоа што придонесуваат за зајакнување на имунитетот, помагаат во намалување на нивото на холестерол и го поддржуваат здравјето на срцето. Во народната медицина, за подобрување на крвната слика често се препорачува и умерена консумација на домашно вино од капини.

Уште старите Грци и Римјани ги користеле плодовите, листовите, кората и коренот од капината за лекување на различни заболувања, од полесни инфекции до каснувања од отровни животни. Во 18 век во Европа капината била толку ценета во третманот на гихт, што ја нарекувале и „бобинка против гихт“.

Богатство од хранливи материи

Капините се меѓу овошјата со највисока содржина на антиоксиданси. Тие содржат антоцијани, елагична киселина и други природни соединенија кои помагаат во заштитата на клетките од оксидативен стрес и придонесуваат за здравјето на кардиоваскуларниот систем.

Иако содржат малку калории, капините се богати со витамини Б1, А, Ц и К, како и со фолна киселина. Од минералите, содржат калциум, железо, магнезиум, калиум и цинк, кои се важни за правилно функционирање на организмот.

Само една рака капини обезбедува околу осум грама растителни влакна, меѓу кои се издвојува пектинот, кој може да помогне во намалување на нивото на „лошиот“ холестерол и да го подобри варењето. Покрај тоа, капините природно содржат и мали количини салицилна киселина, позната по своето противвоспалително дејство.

Добри и за очите

Капините содржат и лутеин, природен пигмент кој има важна улога во зачувувањето на здравјето на очите. Тој помага во заштитата на мрежницата од штетното влијание на сончевата светлина и може да го намали ризикот од појава на макуларна дегенерација и катаракта.

Иако капините се исклучително хранливи и се одличен избор за секојдневната исхрана, тие не се лек за болести. Најголема корист имаат како дел од разновиден и балансиран начин на исхрана и здрав животен стил.