Од специјалното обвинителство се обратија со соопштение во кое во последниот пасус се наведува дека предметите за „бомбите“ се анализираат откако добиле известување од државното обвинителство.
– Потврдуваме дека од нивна страна (од државното обвинителство) доставен е одговор и во овој момент ги анализираме доставените податоци со цел да утврдуваме кој од предметите има приоритет и веднаш треба да се превземе. За сите детали околу преземањето на предметите дополнително ќе бидете известени на 26.11.2015 година (четврток), Соопштение на специјалното обвинителство.
Во наредните 3 дена ќе се анализира, кој функционер чиј глас се слуша во прислушуваните разговори ќе биде распрашуван од тимот на специјалното обвинителство за да се утврди што е вистина во содржината на бомбите за можни злоупотреби на власта. Познато е дека меѓу случаите кои се предадени се изборни измами, закани, корупциски скандали за градежно земјиште, набавки и изградба на автопат со кинески кредити. Во денешното соопштение се наведува дека засега официјалната адреса на специјалното обвинителство е Димитрие Чупоски број 9 односно Министерството за правда. Цели два месеци по изборот Јанева се уште нема свое седиште.
Специјалното откри дека привремено изнајмило простории под закуп- тоа е вториот кат на деловната зграда пред студентскиот дом Кузман Јосифовски Питу. И таму имало подготовки на просториите, потврдија вработени во зградата. До четврток кога Јанева повторно ќе се појави во јавноста, специјалното обвинителство комуницира преку својот фејсбук профил- на кој покрај соопштенијата, се поставени две фотографии, статуа со Јустиција од судот во Франкфурт и бескрајно небо со светлост во заднина.
