На престижните International Documentary Awards (IDA) во Лос Анџелес, документарецот „Приказната за Силјан“ на Тамара Котевска оствари историски успех, освојувајќи две од најважните награди – Најдобар документарен филм (Best Documentary) и Најдобра камера (Best Cinematography).
Филмот на режисерката Тамара Котевска, која светската публика ја запозна преку Honeyland, повторно го сврте вниманието на документарниот свет кон Македонија. Победата доаѓа точно шест години по успехот на Honeyland, кој во 2019 година освои награда за најдобра камера и Pare Lorentz Award на истиот фестивал.
–Да се вратам по шест години во ЛА, на IDA, со нов филм и да ја добијам главната награда за најдобар документарец – е нешто што е над зборови! Ова е мојот омилен документарен настан и мојот најважен филм досега. Ја посветувам оваа награда на сите независни документарни автори кои се борат со незамисливи пречки за да создадат филм. Продолжете да се борите – ние навистина правиме промена!, изјави Котевска.
Филмот победи во категоријата над номинираните: Apocalypse in the Tropics, Life After, Seeds и Songs of Slow Burning Earth.
Инаку, документарецот „Силјан на Тамара Котевска е меѓу петте номинирани за престижната американска награда Независен дух (Independent Spirit), која е предвесник на Оскарите, а ќе се одржи на 15 февруари во „Холивуд Паладиум“. Единствениот македонски филм кој досега ја освоил наградата Независен дух е „Пред дождот“ на Милчо Манчевски, во 1995 за најдобар странски филм. „Пред дождот“ истата година беше и меѓу петте номинирани за Оскар.
