Најдобро време во денот за десерт
Ако ве фаќа желба за чоколадо, колач или друг десерт, времето во кое го јадете можеби не е целосно неважно. Истражувањата покажуваат дека организмот различно реагира на храна во различни делови од денот, особено кога станува збор за регулирањето на глукозата.
Научните податоци укажуваат дека доцното внесување храна, особено богата со шеќери и јаглехидрати, може да предизвика поголеми осцилации на шеќерот во крвта отколку истиот оброк консумиран порано во текот на денот.
Интересни податоци доаѓаат од студија објавена во списанието Diabetes & Metabolism.
Во истражувањето учествувале 17 здрави млади жени без дијабетес. Секоја од нив консумирала ист сладок оброк – печен колач – во три различни термини: во 12:30 часот по ручекот, во 15:30 часот попладне и во 19:30 часот по вечерата. Истражувачите го следеле нивото на глукоза со континуирано мерење на шеќерот во крвта.
Резултатите покажале дека кога колачот бил изеден по вечерата, осцилациите на глукозата биле поголеми во споредба со консумирањето на истиот колач во средината на попладнето. Разликите биле забележани и во утринските часови следниот ден. Тоа сугерира дека, барем кај испитаничките во оваа студија, попладневната ужина била поврзана со поповолен одговор на глукозата во споредба со слатката ужина по вечерата.
Иако времето на консумирање може да има улога, експертите предупредуваат дека не треба целото внимание да се насочи само кон часовникот.
Harvard Health препорачува ужините да содржат поквалитетни извори на јаглехидрати и, по можност, да се комбинираат со протеини или здрави масти, бидејќи таквата комбинација може да помогне јаглехидратите поспоро да се ослободуваат во крвотокот и да придонесе за подолготрајно чувство на ситост.
На пример, наместо голема количина благо, подобар избор може да биде овошје со јогурт или мала порција јаткасти плодови со овошје.
Значи, кога да го јадете десертот?
Ако изборот е помеѓу мал десерт во попладневните часови и истиот десерт непосредно пред спиење, достапните истражувања даваат причина да се избере пораното време.
Но, не постои правило дека слаткото мора да се јаде „само до 17 часот“.
Многу поголемо значење имаат количината, зачестеноста и целокупниот квалитет на исхраната. Како што нагласува Harvard Health, составот на исхраната и вкупниот внес на храна се поважни од едноставното броење на часовите во кои се јаде.
Затоа, ако сакате парче чоколадо или колач, попладневните часови можеби се подобар избор отколку непосредно пред легнување. Но, уште поважно е десертот да биде умерен дел од разновидна исхрана, а не секојдневна замена за квалитетен оброк.
