Премиера на Кајмак во Италија

Филмот „Кајмак“ на најтрофејниот македонски режисер Милчо Манчевски ја имаше и италијанската премиера, во селекцијата на Меѓународниот филмски фестивал во Бари. Овој фестивал е еден од најголемите во Италија и е поврзан со две легендарни имиња на италијанската кинематографија – директорот Феличе Лаудадио, кој во богатата кариера беше на чело и на Венецискиот фестивал и на низа значајни филмски инситутции, како и филмскиот критичар Енрико Марџели кој го претстави „Кајмак“ пред премиерната проекција и го водеше разговорот со авторот Манчевски. „Кајмак“ беше проследен со бурен аплауз во историското кино Петруцели старо 120 години и прогласено за споменик на културата во Италија.

Италијанскиот печат го најави „Кајмак“ како „храбар филм“, а фестивалот вели дека е „Смело и современо дело… Приказна за чувства и привлечност која не се плаши да се занимава со непријатни теми како што се трговија со луѓе и сурогат мајчинство“.

На прес-конференцијата со Манчевски, филмскиот критичар Енрико Марџели даде голем фокус на работата со глумци, со пофалби за воедначеноста на глумата и за одлично одиграните ролји. Тој забележа дека иако филмот е комедија и се занимава со навидум секојдневни ситуации, барањата од актерите биле длабоки, со влегување во суштината на ликовите, а за кастингот рече дека, иако се работи за секојдневни ситуации во филмот, Манчевски им задавал сцени од класиците. Развивајќи интересна дискусија на тема еротика во сериозни филмови, Марџели рече дека му е жал што ја има помалку на филм денес, на што Манчевски коментираше дека делумно тоа е причина на неопуританизмот, како што тој го нарекува, „а бизарно е што неопуританизмот произлегува од диктатурата на размислување од левицата, која би требало да биде слободарска и либерална авангарда“.

Во Бари Манчевски дојде од Софија, Бугарија, каде беше на чело на жирито на фестивалот, а истовремено се одржа и ретроспектива на неговото творештво, во која беше вклучена и бугарската премиера на „Кајмак“. Присуството на Манчевски во Бугарија беше проследено со голем публицитет и бројни интервјуа за бугарските медиуми.

Од 7 април „Кајмак“ ќе се прикажува и во редовната програма во кината низ Бугарија.

Пишувајќи за опусот на Манчевски, еден од најистакнатите бугарски новинари од културата Цветан Цветанов во списанието „Култура“ вели:

„Милчо Манчевски е визионерски волшебник… Мајстор на геометријата на голото човечко тело, без тоа да е основа на неговите филмови, Манчевски создава некои од најубавите еротски сцени во современата европска кинематографија – било да се во молски клуч на духови во ‘Сенки’ или на скоро-комично рамниште во ‘Кајмак’… Не е ни важно, затоа што зборуваме за апсолутни вредности… ‘Кајмак’ е скоро анаграм на ‘Мајки’…“.

На почетокот на месецов, „Кајмак“ ја освои Специјалната награда на жирито во престижната програма Недела на режисерите на фестивалот Фантаспорто во Порто, Португалија.

Во исто време „Кајмак“ беше прикажан и на ФЕСТ во Белград, каде сите три проекции беа однапред распорадени, а актерката екипа од филмот, која присустувуваше на премиерата доживеа огромен аплауз.

„Кајмак“ е седми филм на Манчевски, и е црна комедија и критика на малограѓанскиот морал и на илибералните тенденции во општеството. Беше најгледан филм во Македонија во 2022, а светската премиера ја имаше на филмскиот фестивал во Токио.

„Кајмак“ е македонско-данско-холандско-хрватска копродукција во соработка со МРТВ, а поддржана од Еуримаж. Главните улоги ги толкуваат: Сара Климоска, Александар Микиќ, Камка Тоциновски, Симона Спировска, Ана Стојановска, Филип Трајковиќ и Петар Мирчевски. Продуцент е Јане Ќортошев, директор на фотографија Улрик Боел Бенцен, дизајнер Дејвид Манс, монтажер Емил Нунинга, музиката е на Дејниш стринг квартет и Игор Василев-Новоградска, кастингот е на Милка Анчевска, а маската на Марио Микисанти.