Нина Балабан, охридската олимпијка во дисциплината стрелање со воздушна пушка, денес беше примена од градоначалникот Никола Бакрачески. Градоначалникот потенцираше дека верувањето во своите способности е првиот чекор кон остварување на врвните резултати, но во секој случај истакна дека охриѓани во сабота наутро ќе бидат покрај телевизиските екрани и ќе навиваат за Нина.
„Охриѓани ги држат палците за Нина Балабан, а ние цврсто веруваме дека ќе го дочекаме тој ден Нина да постигне врвен резултат на ова натпреварување и конечно можеби да се закити со некое од најсјајните одличја, меѓутоа како и да е Нина го оствари својот сон кој воедно е и сонот на спортски Охрид и на градот Охрид воопшто бидејќи е навистина голема гордост да се има спортист кој обезбедил олимписка норма токму од својот град“, истакна Градоначалникот Бакрачески.
Младата олимпијка пак искрено и самоуверено рече дека со оглед на трудотт кој го вложила во досегашната нејзина стрелачка кариера, како и во подготовките за настапот на Олимпијадата, таму оди да оствари добар резултат кој не ја исклучува можноста за пласман во финалето и борба за медалите.
„Морам да признаам дека подготовките не беа лесни штое добар знак. Сметам дека сум навистина подготвена и можам да гарантирам дека ќе го дадам својот максимум. Олимијадата е спортски настан кој е врв на кариерата на сите спортисти и нависитна сум пресреќна што сум дел о Македонскиот Олимписки тим. Се надевам и грантирам дека ќе го дадам својот максимум дека ќе се претставам во добро светло како себе така и градот Охрид и република Македонија и можам да гарантирам дека ќе сум оној спортист кој невозможното ќе го направи вoзможно“, вети Балабан.
Градончалникот Никола Бакрачески, во име на градот Охрид на нашата репрезентативка и подари спортска опрема со ознаки на градот Охрид, додека Балабан пак на градоначалникот му подари гравура со ликот на Александар Македонски.
