Ивона Вељаноска и Владимир Вељаноски основачи на СУП Клуб Охрид, извеслаа 101 км на СУП даски од Нови Сад до Белград како учесници на СУП Регата во Србија.
На 18 и 19 јуни 2022 г., заедно со 30 учесници од Србија, Унгарија и Босна и Херцеговина, по околу 14 часа стоечко веслање на даска успешно ги совладаа предизвиците на Дунав. Река која се издвојува со својата природна убавина, прекрасна, понекогаш непредвидлива, никогаш потценета и секогаш возбудлива.
СУП регатата беше организирана од СУП ентузијасти – “SUP Daske“, а учествуваа и клубовите SUP Neoplanta, Green Bear, Kanjon Adventure, Daska i Veslo.
Оваа регата исто така овозможи одличен почеток за интернационална соработка и промоција на овој спорт и природните убавини на сите земји што учествуваа.
Набрзо од СУП Клуб Охрид ќе бидат организирани вакви подвизи и на нашите простори.
Стоечкото веслање на даска е уникатен начин да се биде блиску до природата со дополнителни придобивки како што е вежбање на целото тело, медитација и социјализација. Овој спорт е одличен за уживање и за почетници и оние кои никогаш не пробале, поради тоа што лесно се изучуваат основните техники.
Доколку сеуште не сте го искусиле овој спорт од СУП Клуб Охрид ве покануваат да се приклучите на некоја од нивните авантури ова лето.
Ова лето, уште една новина од младите ентузијасти од овој клуб. Покрај тековните понуди на СУП тури со инструктор и обука за истото, за прв пат во Охрид се организираат часови по јога на СУП даски.
Локацијата за тоа каде ќе биде укотвена платформата е по желба на учесниците, а тие како организатори им предлагаат неколку мирни и спокојни локации каде ќе може да уживаат во звуците на природата и езерото.
