Историски успех на ГКК Охрид на патот кон влез во Прва лига

Охрид од следната сезона би можел повторно да добие прволигашка кошарка, откако Градскиот кошаркарски клуб Охрид, кој постои само три сезони го победи Работнички 2018 со 77:58 во „мајсторката” од четвртфиналето на второлигашкиот плеј-оф и обезбеди пласман во следната фаза.

Следен противник за охридските кошаркарки ќе биде победникот од дуелот помеѓу Соколи од Штип и МКК Куманово и доколку биде помината и оваа фаза, тогаш ГКК Охрид ќе се пласира во Првата лига, без разлика од исходот во финалето, што за овој клуб ќе биде историски успех, а Охрид одново ќе има претставник во Првата кошаркарска лига.

Пласманот во полуфиналето е голем историски успех за овој млад клуб кој е на добар пат да обезбеди место во кошаркарската елита на Македонија. Охрид секогаш имал големи успеси кога е во прашање кошарката. Амак СП клуб кој повеќе не постои во 2009 година го освои Купот на Македонија, а пак Охрид АБ, исто така клуб кој повеќе не постои, беше прв учесник од Македонија во АБА 2 лигата, каде заврши на последното место на табелата.