Младите таленти на охридската кошарка денес зачекорија по стапките на своите идоли. Во Охрид се формира младинска кошаркарска лига. Оваа лига е составена од четири екипи меѓу кои Езерца, Освојувачи, Рисови и Величенствени. Ваквиот начин на натпреварување ќе им овозможи на младите кошаркари да покажат што знаат пред јавноста.
„Со големо задоволство сакам да ве известам вас и охридската јавност дека започнуваме со ГЛОБАЛ кошаркарската лига која е во организација на кошаркарскиот клуб ГЛОБАЛ од Охрид. Учествуваат 4 екипи и се натпреваруваат во лига систем.“-рече Дарко Трајчески-Тренер во Кошаркарскиот клуб-Глобал
Натпреварувачкиот дел од кошаркарската лига започна со мечот помеѓу Езерца и Освојувачи. Натпреварите се одржуваат во салата при основното училиште „Григор Прличев“. Од кошаркарскиот клуб Глобал, за наредната година најавија уште поамбициозни планови.
„Сите членови на овие екипи се дел од кошаркарскиот клуб ГЛОБАЛ. Тренираат активно, а со лигава сакаме да им овозможиме да имаат еден натпреварувачки циклус, да се ослободат од натпреварувачката трема, нормално сакаме да идентификуваме млади таленти, понатака да можеме да работиме со нив. Планот ни е в година лигата да ја зголемиме со уште две екипи, па така лигата да се шири.“-додаде Трајчески
Натпреварите кои денес се одиграа завршија со следните резултати:
Екипата на Езерца ја совлада екипата на Освојувачи со 18 : 17
Рисови загубија од тимот на Величенствени со 18 : 27
додека дуелот помеѓу Синиот и Белиот тим заврши со нерешен резултат од 12 : 12
Со започнувањето на ваквите проекти, но и нивната успешна реализација се наѕираат светли денови за спортот во Охрид. Целта е да се покаже дека Охрид има свои таленти кои паралелно со своето лично надградување, ќе го надградат и спортското живеење на нашиот град.
{loadposition content9}
