Охридската стрелачка Анастасија Мојсовска не се пласираше во финалето на дисциплината воздушна пушка на 10 метри на Олимписките игри во Париз. Таа се пласираше на 31.вото место од вкупно 43 натпреварувачки со резултат од 625,3 кругови.
„Како тренер на Анастасија Мојсовска која денес на 28.07.2024 година во 9 часот и 15 мин настапи на Олимписките игри во Париз 2024 можам да истакнам дека во текот на натпреварот таа се носеше рамо до рамо со сите 42 натпреварувачки и добро се координираше со мене со тоа што сите серии беа над 104 кругови освен една 103.7 со што оствари и највисок резултат воопшто испукан за Македонија на едни олимписки игри во дисциплината воздушна пушка жени. На ова прво учество на Олимписки игри за неа постигна висок резултат од 625.3 кругови со серии: 104.5 103.7 104.3 104.4 104.0 104.4 и се пласира на 31-во место од вкупно 43 натпреварувачки. Во оваа дисциплина позади нас оставивме олимписки, светски и европски медалисти од земји како што се: Америка, Франција, Чешка, Египет, Велика Британија, Бразил и други. Во текот на натпреварот таа погоди 57 центри од вкупно 60 испукани дијаболи за времетраење од 1 час и 15 минути, но во стрелаштвото секој еден зголемен пулс од срцебиење или адреналин делува на квалитетот на центрите што и одлучува кој на крај ќе биде најдобар. За влез во финална борба или пласман во први осум во воздушна пушка жени потребни ни беа 631.3 кругови односно ни фалеа 6 кругови. Овие олимписки игри се покажаа доста посилни во однос на резултатот споредбено со минатите Олимписки игри во Токио каде што за влез во финале потребни беа 628,3 кругови. Се надеваме дека овие Олимписки игри ќе бидат една одскочна даска за 22 годишната Анастасија до европско финале и медал на Европското првенство кое не очекува во почетокот на 2025 год. Максимално очекуваното не го остваривме но сме задоволни од резултатот и пласманот.“, изјави нејзиниот тренер Јордан Тасевски.
Мојсовска е член на СК „Стрелец“ од Скопје, а нејзините почетоци се во СК „Охрид“.
