Синоќешниот пораз на македонската фудбалска репрезентација на гостувањето во Англија (0-7) предизвика реакции и остри критики од јавноста и спортската фела. На адреса на раководството на Фудбалската федерација на Македонија (ФФМ) и националниот тим критика упати и поранешниот капитен на фудбалската репрезентација, Горан Пандев.
Коментирајќи на фотографија на Инстаграм стори на која се претседателот на ФФМ, Муамед Сејдини, спортскиот директор Данчо Масев и селекторот Благоја Милевски, Пандев напиша: „Најголемото зло што некогаш постоело во македонскиот фудбал. Нека ни е на чест на сите“.
Благоја Милевски, селекторот под чие водство фудбалската репрезентација на Македонија го претрпе најтешкиот пораз во својата историја, на прес конференцијата по натпреварот ѝ се извини на нацијата, но најави дека нема намера да поднесе оставка.
„За жал, се случуваат и вакви работи во фудбалот. Ова се истите фудбалери кои играа со Италија и со Португалија. И јас сум истиот тренер, но во фудбалот има и вакви денови. Потфрливме во секој поглед. Тргнувајќи од мене, па потоа во сите линии на теренот. Јас сум одговорен на прво место, јас ги бирам играчите и одредувам кој ќе игра. Игравме против најразиграниот тим во Европа, но потфрливме во сите наши замисли. Ова не значи дека треба да се откажеме. Јас сум борец и не планирам да се откажам, треба да сме силни и сплотени и во вакви тешки моменти.“ -рече Милевски.
