Скијачката федерација на Македонија објави дека Зоран Јовановски ќе биде првиот македонски параолимпиец кој ќе настапи на Зимска параолимпијада – Зимските параолимписки игри Милано-Кортина 2026.
-Ова е историски чекор за скијачките спортови во Македонија и доказ дека со визија, системска работа и посветен тим можеме да поместуваме граници и да создадеме нови страници во спортската историја, велат од Скијачката федерација на Македонија.
Од таму упатија искрена благодарност до целиот стручен тим, тренерите Јане Стефанов и Петар Илев, Вангел Тркаљанов кој го донел параскијањето во државата и организирал над 20 ски кампови, но и до целиот организациски тим и сите кои придонесоа овој успех да стане реалност.
-Како федерација остануваме цврсто посветени на развојот на скијачките спортови, создавање еднакви можности и градење систем што ќе овозможи нови генерации спортисти да стигнат до најголемите светски сцени, додаваат во нивното соопштение.
Инаку, Зимската параолимпијада во Милано и Кортина ќе се одржи од 6 до 15 март.
