Лидерот на здружението на професионални фудбалери во Шпанија (AFE) Luis Rubiales потврди на вчерашната прес конференција дека ќе биде најавен штрајк во последните две кола во Примера и Секонда ако не се уважат нивните барања.
Причината за конфликтот и целата фама е договорот околу телевизиските права кој Здружението на професионални клубови (LFP) го договорило со шпанските власти. Шпанскиот фудбалски сојуз (RFEF) и Здружението на професионални фудбалери очигледно не се сложуваат околу поделбата на колачот и најавуваат прекин на сите фудбалски натпреварувања од 16 мај.
Не треба ни да се замисли каков хаос би настанал ако тоа се случи. На прес конференцијата AFE спомна 50-мина фудбалери од првата и втората лига, а меѓу нив се и асовите на Барселона и Реал Мадрид Чави, Иниеста, Пике, Касиљас и Серхио Рамос, со што е засилен вкупниот впечаток и јасно е дадено до знаење дека AFE е сериозно и дека ја има полната поддршка од непосредните актери.
Пет главни точки на кои AFE инсистира во преговорите се социјалниот дијалог, прашањето за пензии и осигурувања, признавање и застапување на AFE во преговорите околу поделбата на телевизиските права, директна уплата на пари на фудбалерите од заработката од телевизиските права и чесна дистрибуција на парите помеѓу првата и втората лига.
“Фудбалерите одлучија да ги прекинат сите натпреварувања свесни дека имаат право да ги бараат своите права. Не сме против колективната продажба на ТВ правата, но ги бараме и своите права. Мислиме дека договорот е скроен по мерка на клубовите, а не на фудбалерите. Исклучени сме од преговорите. Нема никакви гаранции по социјалните, здравствени и пензиски прашања…”, истакнал Rubiales додавајќи дека властите разговарале со челниците на клубовите, додека фудбалерите никој не ги прашува.
“Ако не се исполнат нашите барања, сѐ е можно. Ќе има штрајк во првенството, додека финалето на Купот на кралот и репрезентативните натпревари ќе се играат нормално”, заклучил Rubiales.
{loadposition content9}
