Наши сограѓани ни испратија слики од охридското пристаниште, каде начекале лоша слика од потоната едрилица. Според нив, силниот ветер и високите бранови во Охридското Езеро повторно направиле штета, а ова не е прв случај пловен објект да биде оштетен или потопен во вакви услови.
-Силниот ветар и брановите во Охридското езеро се причина да потонуваат и да се уништуваат пловни објекти. Или можеби несовесно и неправилно закотвена едрилица? Или немањето на адекватна марина? Која и да е причината, глетката не е убава, велат нашите сограѓани.
За жал, проблемот дополнително ќе се продлабочи со најавените денови на обилни врнежи и нестабилно време, каде се очекуваат да наврнат дури и над 40 l/m² за 24 часа.
Веќе долго време се поставува и прашањето кога конечно Охрид ќе го добие пропишаното, современо и безбедно пристаниште – марина која ќе го штити флотниот капацитет и ќе овозможи уредно и сигурно закотвување на пловните објекти. Граѓаните нагласуваат дека ова не е само туристички или естетски проблем, туку и безбедносен, економски и еколошки.
