Пожарот кој вчера околу 10 часот изутрина ја зафати шумата на потегот Опеница-Прентов мост е целосно ставен под контрола. Како што ТВМ информираше, во интервенцијата беа вклучени и двата специјални авиони-канадери. Со заедничката интервенција на противпожарните служби, двата авиони и локалното население, пожарот беше ставен под контрола. Шефот на заштита од ЈП „Македонски шуми“, Јовче Цветкоски кој сеуште е на терен, не информираше дека првичните проценки говорат за околу 300 хектари опожарена површина, но бројките сеуште не се потврдени. Цветкоски додаде дека во моментот сеуште се забележува чад, но дека тоа е внатре во пожариштето. И ветерот кој вчера ги создаваше најголемите проблеми, денес оди во полза на противпожарните служби. Иако пожарот е ставен под контрола, сепак Цветкоски вели: „Дежурни екипи и натаму остануваат на терен и ќе прават обиколки на зафатеното подрачје, доколку е потребно ќе можат да интервенираат.“ Според мислењето на стручните лица кои работеа на терен, пожарот се смета дека е подметнат, за што биле информирани и единиците на СВР-Охрид. Се појавија шпекулации дека пожарот го подметнало малолетно лице со ментална попреченост во развојот. Го контактиравме и портпаролот на МВР, Иво Котевски кој ни кажа дека во СВР се направени информативни разговори на повеќе лица со цел да се откријат сторителите, но дека немаат поконкретни сознанија.
{loadposition content9}
