За следното рочиште, адвокатите на оштетените најавија користење на механизмот присилно приведување на обвинетиот Кристијан Шапкар по службена должност.
Уште едно одлагање на главниот судски претрес за глисерската несреќа која пред две години се случи во водите на Охридското Езеро. И повторно, и на ова судско рочиште, не се појави обвинетиот Кристијан Шапкар, како и оштетената и сведок Ивана Шапкар. Адвокатот на обвинетиот, Емил Балабан не знаеше да објасни од кои причини и двете лица не се присутни на денешниот главен судски претрес. Од судот информација дека обвинетиот не ја примил поканата и дека истата била оставена под врата.
Адвокатот на оштетените, Татјана Поповски изјави дека ќе ги искористат сите правни механизми и дека постои начин, преку јавниот обвинител, истиот да побара присилно приведување на обвинетиот Шапкар на следното рочиште по службена должност. Поповски додава дека со овој механизам се надеваат оти ќе успеат во намерата, обвинетиот следниот пат да се појави пред судскиот совет во Охрид.
„И покај сите напори кои ги прави судот и Јавното обвинителство во рамките на законските правила и можности, веќе во неколку наврати се одлагаат главните претреси од причини што стојат на страната на одбраната, а за сето ова време од самиот ден на случување на овој настан семејството живее во една агонија, кажа за ТВМ Адвокатот Татјана Поповски. Верувам дека постапката ќе земе свој тек бидејќи сметам дека и мерките кои судот ги определува се оние кои се можни според закон, додаде Поповски.
Во несреќата која се случи на 22.08. 2009 година, настрада Ирина Романова Муцински, додека Кристијан Шапкар заработи кривична пријава за тешки дела против безбедноста на луѓето и имотот во сообраќајот. Следниот судски претрес е закажан за точно еден месец.
{loadposition content9}
