Реконструкција на кејот, како една од најважните туристички зони во градот, најави Константин Георгиески, кандидатот за градоначалник на Охрид од редовите на СДСМ. Кејот „ Македонија” кој е една од главните атракции, најфреквентните и најпосакувани места за охриѓани и за туристите, низ годините е многу амортизиран, бетонот на постојната конструкција на крајбрежниот ѕид во најголем дел е еродиран и оштетен, кажа Георгиески.
„Веќе имаме изготвено Проект за реконструкција, издадено е одобрение за градба и изработена е Студија за оценка на влијанието врз животната средина и социјалните аспекти од реконструкцијата. Вкупната процената вредност на проектот е околу 1,3 милиони евра и за негова реализација планирано е да се обезбедат средства од алтернативни извори на финансирање, како што се фондови или програми кои поддржуваат развој на туристичката инфаструктура.“-кажа Георгиески.
Со реконструкцијата на кејот ќе се опфати површина од 992 метри квадратни на крајбрежниот дел во градската зона. Во рамки на реконструкцијата ќе биде изведена заштитна потпорна конструкција, а предвидено е отстранување на постоечките бехатон плочи и поставување на слој од полупропусен цемент, врз кој ќе бидат поставени гранитни плочи, објасни Георгиески.
„Проектот предвидува и декоративни ѕидчиња од бетон обложени со камени плочки, врз кои ќе бидат поставени дрвени клупи. Исто така ќе биде поставена и нова урбана опрема како што се држачи за велосипеди, корпи за отпадоци, клупи, скали за пристап до водата, нови канделабри за осветлување, а ќе биде изведено и соодветно хортикултурно уредување.“
Георгиески кажа дека негова цел е Охрид да добие јавни површини со современ лик, достојни за еден туристички и културен центар. Додаде дека тој и неговиот тим ги слушаат барањата на граѓаните, ги разбираат нивните потреби и работат континуирано на подобрување на условите за живеење. Проектите кои ги ветуваме се реални и остварливи, подвлече Георгиески.
