Во градскиот архив сместена личната документација на писателот Видое Видически
За да се зачуваат важни културни и историски документи архивистите соработуваат со семејствата и прават фондови во дигитализирана форма. Во историскиот архив на Охрид се преземени пет лични фондови кои содржат значајни материјали.
Архивот на град Охрид збогатен со документација од писателот Видое Видически. Преземен е дел од личниот архивски материјал на писателот Видически кој содржи значајни материјали од неговата богата творечка и општествена дејност како основоположник на радио Охрид, Домот на културата и градскиот архив, информира Никола Митровиќ, директор на Историскиот архив на Охрид.
–Огромно е значењето на оваа и на другите генерации кои ќе можат да ги прелистуваат пишаните работи на рака и на машина од Видое Видически, материјали кои изобилуваат со фотографии, поезија и проза, коишто сведочат за неговото богато творечко дело“.-вели Митровиќ.
Митровиќ напоменува дека архивистите постојано трагаат по документи кои сведочат за локалната и Македонска историја. Во оваа работа мора да се има трпение и желба, а успех на архивистите е да преземат и сочуваат документи во ова депо. Споделува искуства во однос на соработката со семејствата кои поседуваат значајни фамилијарни документи од своите предци и како го зачувуваат нивното творештво во дигитална форма.
–Она што претставува семејно наследство макар било и пишан документ е малку посложено за преземање. Немаме проблем кога ќе укажеме дека оној што творел, една од неговите желби за постоење на тој лик е да ги предаде во архивот. Некогаш преземаме документи како што е во последниот период фотографиите од првата жена фотограф Танасија Волкоја Дајова. Нејзината правнука ни предаде дел од семејното наследство за дигитализација, а потоа го вративме назад“.-додава Митровиќ за Телевизија ТВМ.
Досега, во Историскиот архив на Охрид се преземени пет лични фондови кои содржат значајни материјали. Во фаза на преземање се материјалите од охриѓаните проф.д-р Никола Бошале, хроничар на Охрид, кој научно – истражувачката работа му ја посвети на родниот град од неговото далечно и поблиско минато и од историчарот на уметност и кустос Никола Целакоски.
Новинар : Валентина Неловска