Најзвучно засилување оваа година во охридскиот ракометен клуб е српскиот репрезентативец Стефан Додиќ кој премина од Металург во Охрид. Иако се најавуваше трансфер во поголеми клубови во Европа, првата ѕвезда на екипата ни објасни кој е најзаслужен што тој го облече сино белиот дрес.
За жал имав мали проблеми со Металург, не можевме да се договориме и си заминав порано. Документите ги зедов касно и не можев да склучам трансфер во странство. Така се одлучив тука покрај Раде Стојановиќ кој ми беше тренер во Металург да дојдам овде. Знаев дека немам што да загубам, а можам да научам многу – изјави Додиќ.
Скромниот централен бек признава дека најслаба точка му е нервозата во текот на играта која доста често ја искажува кон судиите. Сето тоа го препишува на младоста и желбата за победа и ветува дека повеќе ќе се насочи кон играта, а не кон судиите. Додиќ е оптимист дека Гладијаторите утре ќе ја прекинат низата од два последователни порази и ќе се вратат на местото на табелата кое го посакуваат.
Јас сум презадоволен искрено кажано. Не очекував дека е ваква атмосферата во екипата. Презадоволен сум и од условите. Мислам дека она што го одигравме со Бутел не е вистинскиот Охрид, туку играта со Еурофарм и Вардар. Се надевам дека ќе играме уште подобро. За нас почнува сезоната и се надевам дека ќе докажеме дека го заслужуваме 3-тото место – вели Додиќ.
Рецептот за победа на утрешниот дуел против Металург е јасен. Брза игра, залагање 100 проценти на теренот и повеќе замени кои ќе држат висок ритам сите 60 минути. Гостинот од Скопје е квалитетна екипа која има одлична прва постава, но нема добра клупа и тука е една од предностите на охриѓани. Втората секако е одличната атмосфера на трибините.
Во Металург немавме своја навивачка група и немав почуствувано ваква атмосфера. Навистина се ветар во грб и е чест да се игра пред Рибари – додава Стефан.
Натпреварот од 8-мото коло во Суперлигата помеѓу Охрид и Металург е закажан за утре (сабота) во 18 часот.
