Обновен објектот на Едриличарскиот клуб„Снегар“ во Струга. После големиот пожар изминатово лето, кога објектот беше комплетно уништен заедно со целокупната едриличарска опрема и пловила, Агенцијата за спорт и млади го возобнови и вчера го пушти во употреба новиот спортски објект.
Станува збор за комлетно нов и современ објект, кој ќе ги задоволува потребите на едриличарите.
„На свечена пригода го отворивме Едриличарскиот клуб во Струга кој беше изгорен на 21 јули. И тоа е една силна порака дека државата се грижи за спортот, државата се грижи за објектите кои настрадале во немили настани. Секако со цел спортистите , спортските работници да се чувствуваат сигурни во тоа дека државата секогаш стои позади нив и секогаш ќе ги помогне во оние тешки случаи или немили настани. Денеска имаме едриличарски клуб „Снегар“ обејкт кој што е современ реконструиран и направен врз база на вистинските вредности и принципи, кои ги имаат клубовите во Западна Европа“, изјави Дарко Каевски директор на Агенција за спорт и млади.
Дополнително ќе се набавува и нова опрема, едрилици од различни категории за непречно функционирање на едриличарскиот клуб и развој на еко водениот спорт.
„Дополнително и со Едриличарската федерација со челниците таму , заеднички со клубот разговараме дополнително ќе преземеме активности дел од едрилиците да се купат нови, но секако тука се и федерациите од регионот со кој веќе стапивме во контакт ни помагаат и дел од опремата веќе ќе ни биде доставена во периодот кој што следи“, додава Каевски.
Едриличарскиот клуб „Снегар“ до темел изгоре на 21 – ви јули годинава. Во пожарот беше пеплосана и целата флота на клубот, изгореа околу триесетина пловила , 4 мотори и 60 години стара документација. Висината на штетата првично беше проценета на околу 300.000 евра.
Клубот е лоциран на доста атрактивна локација на „Градска плажа“ во строгиот центар на брегот на Охридското езеро во Струга. Располага со хангар од околу 250 м2 . Во јавноста проструија повеќе нформации, меѓу кои , дека некои струшки моќници „фрлиле око“ на атрактивната локација. И после четири месеци причините за пожарот останаа не јасни.
-„Полицијата презема понатамошни мерки за утврдување на причините за настанатиот пожар. Тие мерки ги преземаме во соработка со пртивпожарната единица“, вели Стефан Димоски портпарол на СВР Охрид.
„Снегар“ е најстариот едриличарски клуб во земјава, основан во 1959 година во Струга. Во 1973 година почнал да учествува на натпревари на континенталните води во Србија, а во 1975 и на Јадранското Море. Од 1991 година, овој клуб е дел од Едриличарската федерација на Македонија.
