Изложабата опфаќа околу 350 најразлични експонати, како икони, детали од ѕидно сликарство, мали мозаици, предмети од емајл, злато и сребро, уметнички предмети изработени од слонова коска, како и најразличен накит. Организаторите објаснуваат дека изложбата е своевидна сторија за една империја која се простирала од Константинопол (денешен Истанбул), преку Мала Азија, Светата земја и Блискиот Исток, Северна Африка и Египет, Балканот, јужнте делови на Италија и на Шпанија, а која веќе точно 555 години не постои, но која на денешните генерации и на современата цивилизација им оставила трајни вредности и уметнички дела и предмети што сега се собрани во галериите на лондонската Кралска академија на уметноста.
Заедно со охридските икони, се наоѓаат и значајни уметнички дела и предмети од византиско време земени од музеи, галерии и црковни ризници, почнувајки од базиликата Сан Марко во Венеција, преку Британскиот музеј во Лондон, до галериите низ Европа и на Балканот, како и во Русија, Украина, Египет и САД. Изложбата почнува со времето на создавањето на Константинопол во 330 година од римскиот император Константин Велики, а завршува со паѓањето на градот под власта на Отоманските Турци во 1453 година, прикажувајќи ја долгата историја на византиската уметност, но и на господарите и уметниците од светот во кој тие живееле.
Организатори на изложбата се Кралската академија на уметноста во Лондон и музејот Бенаки од Атина.
Во настојување да се избегне секаква политизација на изложбата, јавува дописникот на МИА од Лондон, направен е максимален напор да се оневозможи секакво „присвојување“ на времето и традициите на Византија од „кого било“, вклучувајки ја и Грција, без разлика што главните спонзори на целиот овој скап проект се фондациите на тројца поранешни грчки бродосопственици.
Лондонската Кралска академија не дозволи и „спорот“ на Грција со Македонија околу името да се префрли на британска почва, па сите експонати се означени со името на градовите каде шти тие се постојано изложени, а не на државите од каде доаѓаат, сакајќи да се избегне грчкото инсистирање за нашата земја да се користи привременото, а не уставното име на Македонија. На сите македонски икони стои дека се земени од Охридската галерија, а изборот која од нив ќе се донесе во Лондон, го направија британските експерти.
Изложбата беше отворена во присуство на голем број истакнати личности од светот на културата и уметноста во британскиот главен град, како и од претставници на дипломатскиот кор. На свеченото отворање присуствуваше и амбасадорот на Република Македонија Марија Ефремова.
За посетителите изложбата „1100 години Византија“ ќе биде отворена од сабота, а ќе трае до крајот на март 2009 година.
